កាលពីថ្ងៃសុក្រ ៧រោច ខែបុស្ស ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៣ ខែមករា ឆ្នាំ២០២៣ ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ និងថ្នាក់ដឹកនាំចំនួន ៤រូប បានជួបប្រជុំពិភាក្សាជាមួយ កញ្ញា វ៉ាង ជីង (WANG Jing) ប្រធានានយកដ្ឋានកិច្ចសហប្រតិបត្តិការអន្តជាតិនៃវិទ្យាស្ថានចិនដើម្បីបេតិកភណ្ឌវប្បធម៌ (Chinese Academy for Cultural Heritage) លើគម្រោងកិច្ចសហប្រតិបត្តិការអន្តរជាតិដើម្បីជួសជុលប្រាសាទព្រះវិហារ។ កិច្ចពិភាក្សាផ្តោតលើគម្រោងជួសជុលប្រាសាទព្រះវិហារ គោបុរៈទី ១ ទី២ និងទី៣ ការបណ្តុះបណ្តាលធនធានមនុស្សកំរិតខ្ពស់នៃស្ថាប័នទាំងពីរតាមរយៈ ការផ្លាស់ប្តូរទស្សនកិច្ចសិក្សា និងការរៀបចំបង្កើតមន្ទីរពិសោធន៍និងវិភាគបុរាណវត្ថុនៅ ក្នុងស្រុកជាដើម។ ក្រៅពីនោះ ភាគីចិនដែលមានអ្នកបច្ចេកទេសចំនួន ៨រូបបានចុះសិក្សា ទីតាំងផ្ទាល់ជាមួយថ្នាក់ដឹកនាំនិងមន្ត្រីបច្ចេកទេសនៃអាជ្ញាធរជាតិព្រះវិហារ សិក្សាអំពី ស្ថានភាពប្រាសាទនាពេលបច្ចុប្បន្នដោយប្រើដ្រូន ស្កែន 3D តួប៉មប្រាសាទនៅគោបុរៈទី១ ទី២…

…………………………………… កាលពីថ្ងៃអាទិត្យ ទី​៨ ខែមករា ឆ្នាំ​២០២៣ ក្រុមការងារក្រសួង​វប្បធម៌និងវិចិត្រសិល្បៈ សហការជាមួយ​អាជ្ញាធរមូលដ្ឋាន​ស្រុក​ស្វាយ​ទាប ខេត្ត​ស្វាយ​រៀង បាន​រៀបចំ​ការ​ប្រកួត​ “ល្បែង​ប្រពៃណីវាយ​ប្រដំពានរង្វាន់ស្រុកស្វាយទាប។ ក្នុងព្រឹត្តិការណ៍​ប្រកួត​ល្បែងប្រពៃណីនេះ ​ឯកឧត្តម​អគ្គនាយកបច្ចេកទេស​វប្បធម៌ និង​ឯកឧត្តម​អគ្គនាយក​រដ្ឋបាលនិង​ហិរញ្ញវត្ថុនៃក្រសួង​វប្បធម៌​និង​វិចិត្រ​សិល្បៈ បានអញ្ជើញ​ជា​អធិបតី និង​មានការ​អញ្ជើញ​ចូលរួម​ពីសំណាក់លោក​ស្រីអភិបាល​រង​ស្រុកស្វាយទាប លោកស្រីប្រធានមន្ទីរវប្បធម៌និងវិចិត្រសិល្បៈ​ខេត្ត​ស្វាយ​រៀង លោកប្រធានការិយាល័យ​អប់រំយុវជន​និង​កីឡាស្រុកស្វាយ​ទាប លោកមេឃុំ ព្រម​ទាំងលោក-លោកស្រីនាយក នាយិកា​វិទ្យាល័យ និង​អនុវិទ្យាល័យ​ចំណុះស្រុកស្វាយទាប​។ ការ​ប្រកួត​ល្បែងប្រពៃណីវាយប្រដំយកពានរង្វាន់​ថ្នាក់ស្រុកនេះ មានការ​ចូលរួម​​ពីសំណាក់​សិស្សានុសិស្សជាក្រុមកីឡាវាយប្រដំប្រចាំវិទ្យាល័យ និង​អនុវិទ្យាល័យ​ក្នុងស្រុកស្វាយ​ទាប និង​ក្រុមកីឡាវាយប្រដំប្រចាំភូមិទាំង៦ ចំណុះឃុំព្រៃតាអី សរុបមាន​២៤ក្រុម ស្មើនឹង​៣៧០នាក់។ ក្នុង​ការ​ប្រកួត​យកពានរង្វាន់ខាងលើ​ គេសង្កេតឃើញសិស្សានុសិស្ស​ និង​ប្រជាពល​រដ្ឋក្នុង​មូលដ្ឋានចូលរួមគាំទ្រ​​យ៉ា​ងច្រើន​កុះករ។ ជាលទ្ធផលនៃការ​ប្រកួតគឺ ​ពានរង្វាន់លេខ១និង​លេខ២ បានទៅអនុវិទ្យាល័យ​ស្វាយ​រំពារ​ (ក្រុមទី១ និងទី២) និងពានរង្វាន់លេខ៣ បាន​ទៅក្រុមកីឡាមកពីភូមិ​ស្វាយ​ផ្អែម។ ចំពោះក្រុមទទួលបានពានរង្វាន់លេខ១ ទទួលបានថវិកាចំនួន១,៥០០,០០០៛ លេខ២ ទទួលបានថវិកាចំនួន១,២០០,០០០៛ លេខ៣ ទទួលបាន​ថវិកា១,០០០,០០០៛ និងក្រុមមិនបានទទួលជ័យលាភីទាំង២១ ក្រុម ទទួលបានប័ណ្ណសរសើរនិងថវិកាចំនួន ៥០០,០០០៛។…

នៅថ្ងៃអង្គារ ៤រោច ខែបុស្ស ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១០ ខែមករា ឆ្នាំ២០២៣ លោកជំទាវបណ្ឌិតសភាចារ្យ រដ្ឋមន្ត្រីក្រសួងវប្បធម៌និងវិចិត្រសិល្បៈ បានអញ្ជើញចុះទៅពិនិត្យស្ថានភាពផ្ទះសសរ១០០ នៅវត្តរកាកណ្តាល ខេត្តក្រចេះ ក្រោយការសាងសង់ជួសជុលនិងតម្លើងឡើងវិញចប់សព្វគ្រប់ ដើម្បីអនុញ្ញាតឲ្យមន្ទីរអាចបើកទ្វារជូនសាធារណជនចូលទស្សនាបានជាផ្លូវការ។ ផ្ទះសរសរ១០០ ជាផ្ទះឈើបុរាណមួយដែលមានអាយុកាលជាង១៥០ឆ្នាំ ហើយបច្ចុប្បន្ននេះសសរផ្ទះធំមាននៅសល់តែចំនួន៤០ ដោយឡែកសសរចំនួន៦០ទៀត ក្រសួងបានណែនាំឲ្យមន្ទីរពិនិត្យលទ្ធភាពសាងសង់បន្ថែម និងស្វែងរកថវិកាបន្ថែមពីសប្បុរសជនសម្រាប់ចំណាយលើការសាងសង់។ ក្រៅពីការចូលរួមកម្មវិធីនេះ លោកជំទាវបណ្ឌិតសភាចារ្យ ក៏បានចំណាយពេលវេលាជួបសំណេះសំណាលជាមួយមន្ត្រីរាជការនិងថ្នាក់ដឹកនាំខេត្ត ដោយបានលើកឡើងនូវអនុសាសន៍ណែនាំល្អៗមួយចំនួនទាក់ទងនិងកិច្ចការអភិរក្សបេតិកភណ្ឌជាតិទាំងរូបីនិងអរូបី។ ទន្ទឹមនឹងនោះ លោកជំទាវបណ្ឌិតសភាចារ្យ ក៏បានពន្យល់ពីសារៈសំខាន់នៃកិច្ចការអភិរក្សបុរាណដ្ឋាននិងសំណង់បុរាណនានា ដោយការអំពាវនាវឲ្យមន្ត្រីជួយផ្សព្វផ្សាយនិងបង្ការកុំឲ្យប្រជាពលរដ្ឋវាយកំទេចសំណង់បុរាណនានាដែលនៅក្នុងវត្ត បំផ្លាញទីទួលបុរាណ និងប្រាសាទបុរាណ ព្រោះមរតកទាំងនោះគឺអាចប្រើប្រាស់បង្កើតជាតំបន់ទេសចរទាក់ទាញភ្ញៀវមកចូលទស្សនាបាន ឧទាហរណ៍ជាក់ស្តែងគឺទីតាំងវត្តរកាកណ្តាលនេះតែម្តងដែលមានអគារវត្ត កុដិ និងផ្ទះសសរ១០០កំពុងក្លាយជាតំបន់ទេសចរណ៍របស់ខេត្ត។ ប្រជាពលរដ្ឋគ្រប់រូប មានកត្វកិច្ចក្នុងការការពារសំណង់បុរាណ ហើយមន្ទីរជំនាញនានាចាំបាច់ត្រូវតែឆាប់ចុះស្រង់ស្ថិតិចុះបញ្ជី និងការពារនូវរាល់សំណង់សំខាន់ៗដែលមានអាយុកាលចាប់ពី៥០ឆ្នាំឡើងទៅ។ លោកជំទាវបណ្ឌិតសភាចារ្យ បានបង្ហាញពីការសោកស្តាយចំពោះរាល់សកម្មភាពនានាដែលឈានដល់ការបំផ្លាញសំណង់បុរាណមួយចំនួននារយៈកាលថ្មីៗនេះ។ ឆ្លៀតឱកាសនេះផងដែរ លោកជំទាវបណ្ឌិតសភាចារ្យ ក៏បានផ្តាំផ្ញើសារបន្តជូនជនរួមជាតិផងដែរថា សកម្មភាពនៃការបំផ្លាញសំណង់បុរាណ គឺបទល្មើសព្រហ្មទណ្ឌដែលប្រឈមការកាត់ទោសជាប់មន្ទីរឃុំឃាំង…

អង្គភាពគ្រប់គ្រងបរិស្ថាន-អង្គរនៃអាជ្ញាធរជាតិអប្សរា បើកសវនកម្មផ្ទៃក្នុងប្រព័ន្ធគ្រប់គ្រងបរិស្ថាន-អង្គរ ស្របតាមស្តង់ដារអន្តរជាតិ ISO14001-2015 នៅគ្រប់នាយកដ្ឋាននិងអង្គភាពចំណុះអាជ្ញាធរជាតិអប្សរា ក្នុងគោលបំណងដើម្បីបញ្ជាក់នូវភាពអនុលោមជាប្រចាំនៃប្រព័ន្ធគ្រប់គ្រងបរិស្ថានអង្គរតាមតម្រូវការនៃស្តង់ដារ ISO 14001: 2015 នៅក្នុងរយៈពេលនៃការអនុវត្តបន្តពីសវនកម្មឆ្នាំមុន រយៈពេល២ថ្ងៃ ចាប់ផ្តើមពីថ្ងៃទី១១-១២ ខែមករា ឆ្នាំ២០២៣។ ពិធីបើកនេះ ក្រោមអធិបតីភាពឯកឧត្តម សុខ លក្ខិណា តំណាងឯកឧត្តម ហង់ ពៅ អគ្គនាយកអាជ្ញាធរជាតិអប្សរា និងជាប្រធានប្រព័ន្ធគ្រប់គ្រងបរិស្ថាន-អង្គរ រួមទាំងថ្នាក់ដឹកនាំនាយកដ្ឋាន និងអ្នកជំរុញការងារបរិស្ថានគ្រប់នាយកដ្ឋានពាក់ព័ន្ធ។ ឯកឧត្តម សុខ លក្ខិណា បានលើកឡើងថា ការបើកសវនកម្មផ្ទៃក្នុងគឺដើម្បីត្រួតពិនិត្យវាយតម្លៃ ភាពមិនអនុលោម ចំណុចតាមអង្កេត និងចំណុចអនុសាសន៍ និងចំណុចប្រសើរ នៅក្នុងស្ថាប័នដែលបានអនុវត្តកន្លងមក និងត្រៀមខ្លួនឱ្យស្ថាប័នធានាគុណភាពជប៉ុន Japan Quality Assurance (JQA) ចុះមកធ្វើសវនកម្មលើស្ថាប័នអាជ្ញាធរជាតិ នាពេលខាងមុខនេះ។ សូមបញ្ជាក់ថា ការធ្វើសវនកម្មផ្ទៃក្នុង គឺធ្វើឡើងយ៉ាងទៀងទាត់ ២ដងក្នុងមួយឆ្នាំ ដើម្បីផ្ទៀងផ្ទាត់ឡើងវិញនូវភាពអនុលោមជាប្រចាំរបស់ប្រព័ន្ធគ្រប់គ្រងបរិស្ថាន-អង្គរ ជាពិសេសការអនុវត្តជារួមនៅក្នុងនាយកដ្ឋាននីមួយៗ…

ថ្ងៃពុធ ៥រោច ខែបុស្ស ឆ្នាំខាល ចត្វាស័ក ពុទ្ធសករាជ២៥៦៦ ត្រូវនឹងថ្ងៃទី១១ ខែមករា ឆ្នាំ២០២៣ នៅសារមន្ទីរទួលស្លែង មានរៀបចំកិច្ចប្រជុំរវាងក្រុមការងារនៃក្រសួងវប្បធម៌និងវិចិត្រសិល្បៈ តំណាងដោយឯកឧត្ដម ហាប់ ទូច រដ្ឋលេខាធិការ និងជាតំណាងដ៏ខ្ពង់ខ្ពស់លោកជំទាវបណ្ឌិតសភាចារ្យរដ្ឋមន្ត្រី ជាមួយលោក Sardar Umar Alam ប្រធានការិយាល័យអង្គការយូណេស្កូភ្នំពេញ និងលោក Song Yungjun តំណាងទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំប្រទេសកម្ពុជា ដើម្បីសិក្សាវាយតម្លៃលើគម្រោងអភិរក្សបណ្ណសារសារមន្ទីរទួលស្លែងជំហានទី២ ដែលបានដាក់ស្នើសុំហិរញ្ញប្បទានឥតសំណងពីរដ្ឋាភិបាលសាធារណរដ្ឋកូរ៉េ តាមរយៈ អង្គការ KOICA។ គម្រោងជំហានទី២នេះ ផ្ដោតបន្តលើការអភិរក្សបណ្ណសារសារមន្ទីរ និង ការអប់រំផ្សព្វផ្សាយ ដើម្បីសន្តិភាព។ កន្លងមក ក្រសួងវប្បធម៌និងវិចិត្រសិល្បៈ សហការជាមួយការិយាល័យអង្គការយូណេស្កូភ្នំពេញ បានអនុវត្តគម្រោងអភិរក្សនិងថតចម្លងបណ្ណសារសារមន្ទីរទួលស្លែង ប្រកបដោយជោគជ័យ ក្រោមជំនួយហិរញ្ញប្បទានឥតសំណងពីរដ្ឋាភិបាលសាធារណរដ្ឋកូរ៉េ តាមរយៈអង្គការ KOICA។

លិខិតរំលែកមរណទុក្ខ របស់ថ្នាក់ដឹកនាំ និងមន្រ្តីរាជការក្រសួងវប្បធម៌ និងវិចិត្រសិល្ប: ជូនចំពោះឯកឧត្ដម វ៉ា គឹមហុង ទេសរដ្ឋមន្រ្តី ទទួលបន្ទុកកិច្ចការព្រំដែន ចំពោះមរណភាពរបស់ លោកជំទាវ ញាណធាន ណារី ដែលបានទទួលមរណភាពនៅថ្ងៃព្រហស្បតិ៍ ១៤កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៥ខែមករា ឆ្នាំ២០២៣ វេលាម៉ោង១៨:០០នាទីល្ងាច ក្នុងជន្មាយុ ៧២ឆ្នាំ ដោយរោគាពាធ។