កាលពីថ្ងៃទី២៤ ខែធ្នូ ឆ្នាំ២០១៤ វេលាម៉ោង១៥.០០នាទីរសៀលទៅ នៅបន្ទប់ព្រះវិហារនៃទីស្តីការក្រសួងវប្បធម៌និងវិចិត្រសិល្បៈ មានបើកកិច្ចប្រជុំ អនុគណៈកម្មការរៀបចំសិល្បទស្សនីយភាព នៃគណៈកម្មការអន្តរក្រសួងរៀបចំសន្និសីទពិភពលោកស្តីពីទេសចរណ៍និងវប្បធម៌ ក្រោមអធិបតីភាព លោកជំទាវ ភឿង សកុណា ប្រធានអង្គប្រជុំនិងជារដ្ឋមន្ត្រីក្រសួងវប្បធម៌និងវិចិត្រសិល្បៈ ដែលមានការអញ្ជើញចូលរួមពី លោកជំទាវ ឯកឧត្តម លោក លោកស្រី ជាប្រធាន អនុប្រធាន និងជាសមាជិកអនុគណៈកម្មការរៀបចំសិល្បទស្សនីយភាព បានប្រជុំពិភាក្សាលើកម្មវិធីសម្តែងសិល្បទស្សនីយភាពក្នុងសន្និសីទពិភពលោកស្តីពីទេសចរណ៍និងវប្បធម៌ ដែលនឹងប្រព្រឹត្តទៅនៅខេត្តសៀមរាប នាថ្ងៃទី០៤ ដល់ថ្ងៃទី០៦ ខែកុម្ភៈ ឆ្នាំ២០១៥ ខាងមុខ៕

នៅព្រឹកថ្ងៃទី15 ខែមិថុនា ឆ្នាំ2017 នាសណ្ឋាគារហ្គោលដិនស៊ី ខេត្តព្រះសីហនុ មានប្រារព្ធពិធីសិក្ខាសាលាស្តីពីកម្មវិធីកែទម្រង់ហិរញ្ញវត្ថុសាធារណៈ ដោយបានការអញ្ជេីញចូលរួមជាអធិបតីពីឯកឧត្តម ឡុង ប៉ុណ្ណាសីរីវត្ថ អគ្គនាយករដ្ឋបាលនិងហិរញ្ញវត្ថុនិងជាតំណាងដ៏ខ្ពង់ខ្ពស់លោកជំទាវរដ្ឋមន្រ្តី។ សិក្ខាសាលាដែលមានរយ:ពេលបីថ្ងៃ 15-16-17 ខែមិថុនា ឆ្នាំ2017សហការរៀបចំដោយ ក្រសួងវប្បធម៌និងវិចិត្រសិល្ប: និងក្រសួងសេដ្ឋកិច្ច និងហិរញ្ញវត្ថុ​ ស្របតាមទិសដៅយុទ្ធសាស្រ្តនៃការកែទម្រង់ប្រព័ន្ធថវិកានៅកម្ពុជា 2013-2020 និងចូលរួមអនុវត្តសាកល្បងថវិកាកម្មវិធីពេញលេញយ៉ាងយូរបំផុតនៅឆ្នាំ2018 ។សិក្ខាកាមប្រមាណ130នាក់ ជាមន្រ្តីជំនាញតាមអង្គភាពនិងមន្ទីរវប្បធម៌រាជធានី ខេត្ត ក្រោមឱវាទក្រសួងចូលរួមក្នុងសិក្ខាសាលានេះ។

កាលពីថ្ងៃទី២៥ ខែធ្នូ ឆ្នាំ២០១៤ វេលាម៉ោង១០.០០នាទីព្រឹកទៅ នៅទីស្តីការក្រសួងវប្បធម៌និងវិចិត្រសិល្បៈ លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានអនុញ្ញាតជូន លោក Valeriu Arteni ទីប្រឹក្សាទូតរ៉ូម៉ានី មានទីស្នាក់ការនៅទីក្រុងហាណូយ ចូលជួបសម្តែងការគួរសម និងពិភាក្សាការងារពាក់ព័ន្ធនឹងកិច្ចសហប្រតិបត្តិការវប្បធម៌រវាងប្រទេសទាំងពីរ ដោយកន្លងមកកិច្ចព្រមព្រៀងសហប្រតិបត្តិការរវាងប្រទេសកម្ពុជា និងប្រទេសរ៉ូម៉ានីពុំសូវមានទំនាក់ទំនងទៅលើវិស័យវប្បធម៌នោះទេ។ លោកជំទាវរដ្ឋមន្ត្រីក្រសួងវប្បធម៌និងវិចិត្រសិល្បៈ បានសម្តែងការស្វាគមន៍ និងជាការឆ្លើយតប លោក Valeriu Arteni ទីប្រឹក្សាទូតរ៉ូម៉ានី ក្រសួងវប្បធម៌និងវិចិត្រសិល្បៈនឹងពិនិត្យរៀបចំកិច្ចព្រមព្រៀងលើវិស័យវប្បធម៌រវាងប្រទេសទាំងពីរ ដើម្បីជម្រុញកិច្ចសហប្រតិបត្តិការលើវិស័យវប្បធម៌ឲ្យកាន់តែប្រសើរឡើងថែមទៀត៕

កាលពីថ្ងៃទី២៤ ខែធ្នូ ឆ្នាំ២០១៤ វេលាម៉ោង១០.០០នាទីព្រឹកទៅ នៅបន្ទប់ព្រះវិហារនៃទីស្តីការក្រសួងវប្បធម៌និងវិចិត្រសិល្បៈ មានបើកកិច្ចប្រជុំគណៈកម្មការមេប្រយោគរៀបចំមហោស្រពសិល្បៈយុវជនទូទាំងប្រទេស ក្រោមអធិបតីភាព ឯកឧត្តម សំរាំង កំសាន្ត ប្រធានអង្គប្រជុំនិងជារដ្ឋលេខាធិការក្រសួងវប្បធម៌និងវិចិត្រសិល្បៈ ដែលមានការអញ្ជើញចូលរួមពី ឯកឧត្តម លោក លោកស្រី ប្រធាន អនុប្រធាន សមាជិកគណៈកម្មការមេប្រយោគរៀបចំមហោស្របសិល្បៈយុវជនទូទាំងប្រទេស បានប្រជុំពិភាក្សាលើការរៀបចំសំណួរ-ចម្លើយ Q&A ស្តីពីយុវជនដើម្បីវប្បធម៌ជាតិ សម្រាប់បេក្ខភាពប្រឡងក្នុងមហោស្រពសិល្បៈយុវជនទូទាំងប្រទេស ដើម្បីអបអរទិវាវប្បធម៌ជាតិ ៣មីនា លើកទី១៧ ឆ្នាំ២០១៥ ខាងមុខ៕

កាលពីថ្ងៃទី១៩ ខែធ្នូ ឆ្នាំ២០១៤ វេលាម៉ោង១៤.៣០នាទីរសៀលទៅ នៅទីស្តីការក្រសួងវប្បធម៌និងវិចិត្រសិល្បៈ លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានអនុញ្ញាតជូន លោក KOJI HOTTA តំណាងក្រុមហ៊ុន TOEI COMPANY, LTD. តំណាងអគ្គរាជទូតជប៉ុនប្រចាំកម្ពុជា និងសហការី ចូលជួបសម្តែងការគួរសម និងពិភាក្សាការងារពាក់ព័ន្ធនិងកិច្ចសហប្រតិបត្តិការវប្បធម៌រវាងប្រទេសទាំងពីរ ពិសេសកិច្ចសហប្រតិបត្តិការងារលើវិស័យបេតិកភណ្ឌវប្បធម៌រវាងសារមន្ទីរជាតិកម្ពុជា និងក្រុមហ៊ុន TOEI COMPANY, LTD. ក្នុងការនាំយកវត្ថុបុរាណខ្មែរទៅតាំងពិព័រណ៌នៅប្រទេសជប៉ុន នៅឆ្នាំ២០១៧ ខាងមុខ៕

នាព្រឹកថ្ងៃទី១៨ ខែធ្នូ ឆ្នាំ២០១៤ វេលាម៉ោង០៨.៣០នាទីនេះ នៅសាលអង្គរវត្តនៃទីស្តីការក្រសួងវប្បធម៌និងវិចិត្រសិល្បៈ មានប្រារព្វពិធីប្រគល់សញ្ញាបត្រថ្នាក់បរិញ្ញាបត្រដល់និស្សិត និងប្រកាសបើកម្មវិធីបណ្តុះបណ្តាលថ្នាក់អនុបណ្ឌិតផ្នែកមនុស្សសាស្ត្រ ក្រោមកិច្ចសហប្រតិបត្តិការជាមួយវិទ្យាស្ថាន INALCO (Institute de Recherche Pour Le Développement) នៃប្រទេសបារាំង នៅសាកលវិទ្យាល័យភូមិន្ទវិចិត្រសិល្បៈ ក្រោមអធិបតីភាព លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ ដែលមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក សាកលវិទ្យាធិការ លោក លោកស្រី ព្រឹទ្ធបុរសមហាវិទ្យាល័យ សាស្ត្រាចារ្យនៃ សភវស. និងវិទ្យាស្ថាន INALCO ដើម្បីអបអរសាទរពិធីប្រគល់សញ្ញាបត្រថ្នាក់បរិញ្ញាបត្រដល់និស្សិតនៃសាកលវិទ្យាល័យភូមិន្ទវិចិត្រសិល្បៈទាំងប្រាំមហាវិទ្យាល័យ ដែលបានបញ្ចប់ការសិក្សាដោយជោគជ័យក្នុងឆ្នាំសិក្សា២០១២-២០១៣ សរុបទាំអស់ចំនួន២៥៤នាក់ នារី៧៣នាក់ ក្នុងនោះមាន៖ មហាវិទ្យាល័យស្ថាបត្យកម្មនិងនគរោបនីយវិទ្យាចំនួន១៣២នាក់ នារី១៧នាក់, មហាវិទ្យាល័យបុរាណវិទ្យាចំនួន៣៧នាក់ នារី១៥នាក់, មហាវិទ្យាល័យសិល្បៈនាដសាស្ត្រចំនួន០៩នាក់ នារី០៦នាក់, មហាវិទ្យាល័យតូរ្យតន្ត្រីចំនួន១៤នាក់ នារី០៧នាក់ និងមហាវិទ្យាល័យសិល្បៈសូនរូបសរុបចំនួន៦២នាក់ នារី២៨នាក់ក្នុងនោះមានជំនាញវិចិត្រកម្ម តុបតែងលំអនៃស្ថាបត្យកម្ម គំនូរសាគមន៍នាគមន៍ និងចម្លាក់ទំនើប៕

នាព្រឹកថ្ងៃទី១៧ ខែធ្នូ ឆ្នាំ២០១៤ វេលាម៉ោង០៨.៣០នាទីនេះ នៅសាលអង្គរវត្តនៃទីស្តីការក្រសួងវប្បធម៌និងវិចិត្រសិល្បៈ មានប្រារព្វពិធីប្រកាសតែងតាំង ផ្ទេរ និងប្រគល់ភារកិច្ចជូនមន្ត្រីរាជការថ្នាក់អនុប្រធាននាយកដ្ឋាន ប្រធាននាយកដ្ឋាន អគ្គនាយករង ជំនួយការ ទីប្រឹក្សា និងថ្នាក់ស្មើ ក្រោមអធិបតីភាព លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ ដែលមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក សាកលវិទ្យាធិការ សភវស. លោក លោកស្រី អគ្គនាយករង ប្រធាន អនុប្រធាននាយកដ្ឋាន និងមន្ត្រីជាច្រើនរូបទៀត ដើម្បីអបអរសាទរដល់មន្ត្រីដែលត្រូវប្រកាសតែងតាំង ផ្ទេរ និងប្រគល់ភារកិច្ចថ្មីនៃក្រសួងវប្បធម៌និងវិចិត្រសិល្បៈ៕

នៅព្រឹកថ្ងៃទី១៥ ខែធ្នូ ឆ្នាំ២០១៤នេះ ក្រសួងវប្បធម៌ និងវិចិត្រសិល្បៈ និងអង្គការខ្មែរអមតៈបានរៀបចំសិក្ខាសាលាស្តីពីចាប៉ីដងវែង ដើម្បីត្រៀមដាក់បញ្ចូលជាបេតិកភណ្ឌអរូបីនៃមនុស្សជាតិរបស់ពិភពលោក ៕

សន្និសីទអន្តរជាតិស្តីពីប្រទេសកម្ពុជានិងការស្រាវជ្រាវអំពីអតីតកាលនៃសង្គមខ្មែរនិងប្រទេសជិតខាង ត្រូវបានប្រារព្ធធ្វើឡើងនៅព្រឹកនេះក្រោមអធិបតីភាព ឯកឧត្តម ថៃ នរៈសត្យា រដ្ឋលេខាធិការ តំណាងដ៏ខ្ពង់ខ្ពស់លោកជំទាវរដ្ឋមន្រ្តី និងមានការចូលរួមពីអ្នកផ្តល់បទអន្តរាគមន៍មួយចំនួនមកពីបារាំង ឥណ្ឌា ជប៉ុន និងអ្នកសិក្សាស្រាវជ្រាវពីសាកលវិទ្យាល័យនានានៅកម្ពុជា ។ សូមបញ្ជាក់ថាសន្និសីទនេះប្រារព្ធធ្វើឡើងរយៈពេលបីថ្ងៃគឺថ្ងៃទី១៥-១៧ ខែធ្នូ ២០១៤ នៅសណ្ឋាគារភ្នំពេញ ៕